Bile Seirbheis Nàiseanta a' Chùraim (Alba) Ceistean is Freagairtean – seiseanan conaltraidh

An Treas Roinn

Chan eil iomradh sam bith anns a' Bhile air an eadar-aghaidh eadar bùird cùraim agus an treas roinn. Tha seo na phàirt chudromach de shlàinte is cùram sòisealta. Carson a chaidh am fàgail às?

• Tha ullachaidhean anns a' Bhile a tha a' buntainn ri bùird cùraim, a' gabhail a-steach gum feum co-chomhairle a bhith ann air planaichean Ro-innleachdail agus ro-innleachdan coimiseanaidh beusach ach tha ullachadh ann gun tèid na bùird cùraim a stèidheachadh tro dàrna reachdas, nach gabh a thoirt air adhart ach gus an tèid am Bile aontachadh.
• Tha e a' cur an cèill frèam airson nan atharrachaidhean a tha sinn airson a dhèanamh agus a' toirt chumhachdan do Mhinistearan na h-Alba a bhith ag obair tron mhion-fhiosrachadh, tro phròiseas co-dhealbhachaidh le luchd-cùraim gun phàigheadh, daoine a gheibh taic agus an fheadhainn a tha ga toirt seachad.
• Tha sinn mar-thà an sàs le Co-bhanntachd Luchd-solair Cùraim is Taic ann an Alba (Coalition of Care and Support Scotland - CCPS) mar riochdaire mòr de sholaraichean seirbheisean cùram sòisealta san treas roinn agus tha mòran sholaraichean air a dhol an sàs anns na pròiseasan co-chomhairleachaidh mar-thà, a’ gabhail a-steach tachartasan co-òrdanaichte agus a’ cho-chomhairle sgrìobhte foirmeil. Tha sinn an dùil am pròiseas co-dhealbhaidh a chur air bhog a dh’aithghearr agus tha sinn fhathast a’ beachdachadh air an dòigh as fheàrr gus barrachd com-pàirt a thoirt dhan raon fharsaing de bhuidhnean, a’ gabhail a-steach buidhnean treas roinn aig a bheil ùidh ann an cruthachadh na Seirbheis Cùraim Nàiseanta, anns a’ phròiseas dealbhaidh.

Ciamar a tha am Bile a' beachdachadh air prìomh àite na treas roinne agus taic stèidhichte sa choimhearsnachd?

• Tha ullachadh anns a’ Bhile airson modail de choimiseanadh beusach agus solar beusach a chur an àite nam modailean a th’ ann aig an àm seo airson seirbheisean cùraim a choimiseanadh.
• Bidh an t-Seirbheis Chùraim Nàiseanta a’ dealbhadh agus a’ lìbhrigeadh a seirbheisean gu h-ionadail gus dèanamh cinnteach gu bheilear a’ toirt aire do dh’fheumalachdan an neach fa leth agus nan suidheachaidhean ionadail. Gabhaidh seo a-steach leantainn air adhart ag obair le carthannasan speisealach agus solaraichean seirbheisean cùraim san treas roinn.
• Tha Ministearan cuideachd an dùil am Bile a chleachdadh gus cumhachdan a thoirt don t-Seirbheis Chùraim Nàiseanta cuid de dh’eacarsaichean solarachaidh a ghleidheadh do bhuidhnean san treas roinn.  
• Tha raon de chùisean co-cheangailte ri bùird cùraim ionadail na Seirbheis Cùraim Nàiseanta a dh’fheumar a sgrùdadh mar phàirt den phròiseas co-dhealbhachaidh agus com-pàirteachadh luchd-ùidh a bharrachd, a’ gabhail a-steach Ballrachd a’ Bhùird, coimiseanadh beusach agus planadh ro-innleachdail agus tha e coltach gum bithear a’ coimhead air prìomh àite na treas roinne mar phàirt de seo.

Cuideachd, ciamar a nì sinn cinnteach gu bheil taic ionmhais dhan treas roinn san fhad-ùine, chan ann san ùine ghoirid?

• Bidh coimiseanadh beusach agus solar beusach na chlach-oisinn a chleachdas Seirbheis Nàiseanta a' Chùraim gus cumadh a thoirt air co-dhùnaidhean coimiseanaidh is solarachaidh, a' gabhail a-steach coimiseanadh air seirbheisean san treas roinn.
• Tha sinn a' stèidheachadh buidheann-obrach aig an àm seo le prìomh luchd-ùidh gus beachdachadh air leasachaidhean a dh'fhaodar a dhèanamh air a' phròiseas coimiseanaidh làithreach agus gus beachdachadh air raointean de dheagh chleachdadh a dh'fhaodar a thoirt a-steach.
• Tha sruth-obrach 'Cruthachadh Margaidh' ann am Prògram Seirbheis Nàiseanta a' Chùraim. Lìbhrigidh am pròiseact seo innealan agus dòighean-obrach airson seirbheisean fhaighinn tro chùmhnantan, tabhartasan, agus caidreachasan a tha seasmhach a thaobh ionmhais agus a choileanas feumalachdan dhaoine a tha a' faighinn cùram agus feumalachdan nan daoine a tha a' lìbhrigeadh cùraim. Thèid innealan agus dòighean Cruthachadh Margaidh a dhealbhadh le solaraichean cùram sòisealta san treas roinn agus san roinn phrìobhaidich, coimiseanairean, eòlaichean solarachaidh agus luchd-ùidh eile. Beachdaichidh e air mar a bheirear piseach air seasmhachd ionmhasail nan seirbheisean a th' ann an-dràsta, agus mar a ghabhas seirbheisean nach eil air an tabhann leis a' mhargaidh an-dràsta a dhealbhadh agus a dhèanamh tèarainte ann an dòighean as urrainn do sholaraichean a lìbhrigeadh.