Hayward Review summary paper - Gaelic version

6. Carson a bhiodh an SDA na b' fheàrr?

6.1 Na b' fheàrr do luchd-ionnsachaidh

Bhiodh an SDA a' toirt cruth-atharrachadh air an Ìre as Àirde. Bhiodh Ìre as Àirde an luchd-ionnsachaidh a' co-thaobhadh na b' fheàrr ri lèirsinn tùsail CfE. Bhiodh barrachd roghainn agus barrachd chothroman aig luchd-ionnsachaidh an Ìre as Àirde aca a phearsanachadh. Bheireadh iad sin taic na b' fheàrr do luchd-ionnsachaidh agus iad a' gluasad bhon sgoil dhan cholaiste, cosnadh, oilthigh no dhan roinn shaor-thoileach.

"Tha sinn air bliadhna a chur seachad ag obair air na modailean atharrachaidh a thathar a' moladh agus air Dioplòma Coileanaidh na h-Alba ùr; modail a tha mi fada den bheachd a chumas an UNCRC aig a chridhe leis gu bheil e a' toirt taic do dhaoine òga san àm ri teachd air an turasan ionnsachaidh fhèin." Beinn Grant (SYP)

6.2 Na b' fheàrr do thidsearan agus òraidichean

Chuireadh an SDA às dhan "chabhaig dhà theirm" a tha a' fàgail gu bheil cuairt leantainneach ann de dh'fho-dheuchainnean (prelims) agus de dh'ullachadh airson deuchainnean. Bidh barrachd ùine aig tidsearan agus òraidichean gus fòcas a chur air gnàth-eòlasan ionnsachaidh beairteach, àrd-inbhe.

"Mu dheireadh, tha cothrom againn, tro Dhioplòma Coileanaidh na h-Alba, a bhith a' cur rùintean foghlaim nas fharsainge an gnìomh ann a bhith a' cumadh dhaoine agus beatha ann an dòigh adhartach, agus chan ann a-mhàin a bhith a' tomhas no a' cunntadh coileanaidhean luchd-ionnsachaidh ach a bhith ag aithneachadh agus a' cur luach annta gu h-iomlan. Feumaidh sinn greimeachadh air a' chothrom seo le ar dà làimh." Andrea Bradley (EIS)

6.3 Na b' fheàrr do dh'oilthighean, colaistean, fastaichean agus dhan fheadhainn a chleachdas teisteanasan

Bheireadh am fiosrachadh nas fharsainge agus nas pearsanta air a thoirt seachad tron SDA bunait fianais na b' fheàrr do cholaistean, fastaichean agus oilthighean gus na co-dhùnaidhean aca fhiosrachadh mu dè na h-oileanaich no an luchd-obrach as freagarraiche airson a' chùrsa no airson na h-obrach.

"Nuair a bhios an comann-sòisealta ag atharrachadh, bidh foghlam oilthigh ag atharrachadh còmhla ris, agus feumaidh oileanaich oilthigh san àm ri teachd fàs eòlach chan ann a-mhàin air eòlas cuspair sònraichte, ach cuideachd a bhith a' fighe an eòlais thoinnte sin ri chèile ann an co-theacsan a tha a' sìor fhàs mì-chinnteach, caochlaideach agus iom-fhillte. Agus nas cudromaiche bidh aca ri fàs nas eòlaiche air an sgil a bhith ag ionnsachadh, gus an urrainn dhaibh cur gu h-èifeachdach ri comann-sòisealta, gnìomhachas, proifeiseanan, cultar agus poileataidh na h-Alba. Bheir Dioplòma Coileanaidh na h-Alba a thathar a' moladh deagh bhunait do luchd-ionnsachaidh agus iad a' dèanamh ceuman oilthighe san àm ri teachd." An t-Àrd-ollamh Jonathan Powles (Oilthighean Alba)

6.4 Na b' fheàrr do dh'Alba

Tha an sòisealtas ag atharrachadh gu luath. Tha mòran dhùthchannan gu h-eadar-nàiseanta a' feuchainn ris na teisteanasan agus na siostam measaidh aca atharrachadh agus ùrachadh. Feumaidh siostam na h-Alba cumail suas ris an atharrachadh seo.

"Tha sinn a' tighinn beò ann an saoghal a tha ag atharrachadh gu luath. Feumaidh siostaman foghlaim gabhail ri seo, agus gu h-eadar-nàiseanta tha sinn a' faicinn atharrachaidhean air an dòigh sa bheil oileanaich ag ionnsachadh agus na tha iad ag ionnsachadh. Ged bha Alba air thoiseach air càch a thaobh seo leis a' Churraicealam airson Sàr-mhathais, tha an siostam measaidh eachdraidheil aice air na h-atharrachaidhean ann am foghlam àrd-sgoile aig an Ìre as Àirde a chuingealachadh. Tha Buidheann Lèirmheas Neo-eisimeileach an Àrd-ollaimh Hayward air feuchainn ri siostam sgrùdaidh na h-Alba a cho-thaobhadh nas fheàrr ris na feumalachdan co-aimsireil sin. Tha e a' toirt dhuinn slighe air adhart chumhachdach airson measadh ann an Alba." An t-Àrd-Ollamh Gòrdan Stobart (IoE, UCL)