Plana Nàiseanta nan Eilean agus Stiùireadh air Measaidhean Buaidh air Coimhearsnachdan nan Eilean

Facal-tòiseachaidh Ministireil

Tha e na thlachd mhòr dhomh iarraidh oirbh cuir ris a’ phròiseas co-chomhairleachaidh cudromach agus eachdraidheil seo. Cuidichidh ur beachdan sinn gus susbaint a chruthachadh airson a’ chiad Plana Nàiseanta nan Eilean agus Measaidhean Buaidh air Coimhearsnachdan nan Eilean ann an Alba.

Tha mi air leth moiteil a bhith a’ stiùireadh an obair seo. Tha ar n-eileanan nan àiteachan mìorbhaileach a bhith a’ fuireach, a bhith nad oileanach agus a bhith nad neach-turais. Tha luach mhòr aig gach eilean, agus tha iad uile a’ cur mòran ri Alba air fad a thaobh cultar, fàs eaconomach, solarachadh cumhachd agus tarraingeachd do luchd-turais eadar-nàiseanta. A bharrachd air seo, tha an sluagh a tha a’ fuireach nar coimhearsnachdan sna h-eileanan iad fhèin mar mhaoin sònraichte. Tha ar n-eileanaich tàlantach agus làn spionnadh iomairteach. Ach, tha mi ag aithneachadh gu bheil dùbhlain ann – gu h-àraidh mun cuairt air mothachadh gu bheil iad iomallach. ’S ann airson na h-adhbhar seo a tha sinn a’ sireadh ur beachdan air mar as urrainn dhuinn Plana Nàiseanta nan Eilean a leasachadh agus a lìonadh – airson ar coimhearsnachdan sna h-eileanan a chuideachadh a bhith beò agus fallain.

Tha na dùbhlain a tha mu choinneamh na h-eileanan ag àrdachadh am mòr-mheas a th’ agam airson tapaidheachd agus spionnadh nan eileanaich agus tha mi gu daingeann a’ creidsinn gu bheil leasachadh a’ chiad Plana Nàiseanta nan Eilean a’ riochdachadh fìor chothrom cruth a thoirt dha ar n-àm ri teachd. Tha dualchas, cruthan-tìre agus iomadachd a thaobh bith-eòlas air tìr agus aig muir gu math sònraichte aig ar n-eileanan agus tha na feumalachdan airson na stòrasan luachmhor seo a ghlèidheadh agus a leasachadh aig bunait ar slighe air adhart. 

Tha mi airson gum bi Plana Nàiseanta nan Eilean àrd-amasach, a mhìnicheas lèirsinn airson an fhad-ùine air na dh’fhaodas ar n-eileanan dèanamh agus gus dèanamh cinnteach gu bheil tèarainteachd leantainneach aig na rudan sònraichte mu dheidhin ar n-eileanan agus gun lean am beairteas agus soirbheas. 

Tha mi a’ coimhead air adhart ri ur beachdan a chluinntinn agus tha mi airson taing a thoirt dhuibh pàirt a ghabhail sa phròiseas chudromach seo.

Paul Wheelhouse
Ministear airson Cumhachd, Comas-ceangail agus na h-Eileanan