Plana Nàiseanta nan Eilean agus Stiùireadh air Measaidhean Buaidh air Coimhearsnachdan nan Eilean

Measaidhean Buaidh air Coimhearsnachdan nan Eilean

30. Far a bheil Plana Nàiseanta nan Eilean ag amas air cruth a thoirt do phoileasaidh riaghlaidh ann an dòigh a leasaicheas toraidhean do choimhearsnachdan sna h-eileanan, tha Measaidhean Buaidh air Coimhearsnachdan nan Eilean a’ coileanadh dreuchd na bu luaithe. Le bhith a’ dèanamh Measadh Buaidh air Coimhearsnachdan nan Eilean, ni Riaghaltas na h-Alba, ùghdarrasan ionadail agus ùghdarrasan buntainneach cinnteach gun tèid reachdas, poileasaidh, ro-innleachdan agus seirbheisean a dhèanamh freagarrach airson eileanan, far a bheil e coltach gum bi buaidh aca seo air coimhearsnachd sna h-eileanan a tha eadar-dhealaichte bhon bhuaidh aca air coimhearsnachdan eile. Anns na suidheachaidhean sin, ni Measaidhean Buaidh air Coimhearsnachdan nan Eilean cinnteach gun tèid an dleastanas air ùghdarrasan buntainneach a leanas a choileanadh: “Feumaidh ùghdarras ionadail aire a thoirt air coimhearsnachdan sna h-eileanan ann a bhith a’ coileanadh an dreuchdan”.^{[10] [11]} Agus ’s ann tro Mheasaidhean Buaidh air Coimhearsnachdan nan Eilean a thèid aire a thoirt air ùidhean choimhearsnachdan sna h-eileanan nuair a thèid co-dhùnaidhean a ruighinn.

31. Tha Achd nan Eilean (Alba) a’ mìneachadh gun tèid Measadh Buaidh air Coimhearsnachdan nan Eilean a chumail le ùghdarras buntainneach^[12] “nuair a tha e coltach gum bi buaidh aig poileasaidh, ro-innleachd no seirbheis air coimhearsnachd sna h-eileanan a tha gu sònraichte eadar-dhealaichte bhon bhuaidh a bhios aige air coimhearsnachdan eile (a’ gabhail a-steach coimhearsnachdan eile sna h-eileanan) san raon anns am bi an ùghdarras a’ coileanadh an dreuchdan.”^[13]

32. Chan eil stiùireadh ann an Achd nan Eilean (Alba) air mar a bu chòir do dh’ùghdaras Measadh Buaidh air Coimhearsnachdan nan Eilean a dhèanamh. An àite seo, tha an Achd a’ leigeil le Ministearan stiùireadh ullachadh mun dleastanas gus aire a thoirt dha coimhearsnachdan sna h-eileanan, agus tha Measadh Buaidh air Coimhearsnachdan nan Eilean mar phàirt de seo.^[14] Feumaidh Ministearan cuideachd riaghailtean ullachadh “mu dheidhinn ath-sgrùdadh air co-dhùnaidhean a ruigeas ùghdarrasan buntainneach a thaobh measaidhean buaidh air coimhearsnachdan nan eilean.”^[15]

33. Tha an co-chomhairleachadh a gheibhear san sgrìobhainn seo a’ togail air an dà ghnìomh seo. Tha an Achd a’ cur dleastanas air Ministearan co-chomhairleachadh a chumail le ùghdarrasan ionadail, a bharrachd air riochdairean bho choimhearsnachdan sna h-eileanan agus daoine eile mus cur iad stiùireadh sam bith mun dleastanas seo, agus mus tèid Plana Nàiseanta nan Eilean ullachadh. Tha Riaghaltas na h-Alba airson còmhraidhean a chumail le coimhearsnachdan sna h-eileanan agus le raon cho farsaing sa ghabhas de dh’ùidhean airson an stìureadh agus am Plana ullachadh. Tha Riaghaltas na h-Alba den bheachd gum bu chòir an cothrom a bhith aig coimhearsnachdan sna h-eileanan am beachdan a chur air adhart air Plana Nàiseanta nan Eilean agus air leasachadh Measaidhean Buaidh air Coimhearsnachdan nan Eilean. Tha an co-chomhairleachadh seo a’ toirt dhaibh an cothrom sin.