Scottish social housing charter: Gaelic translation

A' faighinn luach math bho mhàl agus prìsean seirbheis

13: Luach an airgid

Bidh uachdarain shòisealta a' stiùireadh gach taobh dhen ghnothachas aca gus am bi:

luchd-gabhail, luchd-seilbhe agus luchd-ceannaich eile a' faighinn sheirbheisean anns a bheil luach a tha a' sìor dhol am meud airson a' mhàil agus nam prìsean eile a tha iad a' pàigheadh.

Tha a' bhuil seo a' gabhail a-steach a bhith a' cumail rian èifeachdach is buadhach air seirbheisean. Na lùib tha: a' lughdachadh na h-ùine a tha taighean falamh; a' cumail rian èifeachdach air fiachan agus gach stòras; a' cumail rian air cosgaisean; a' faighinn luach an airgid bho chùmhnantan; a' gleidheadh barrachd luach bho airgead le bhith a' toirt piseach air seirbheisean le cho beag cosgais a bharrachd as urrainn do luchd-gabhail, luchd-seilbhe agus luchd-ceannaich eile; a' toirt cothrom do luchd-gabhail is luchd-ceannaich a bhith an sàs ann a bhith a' stèidheachadh ìrean màil agus prìsean sheirbheisean; agus a' sgrùdadh agus a' dèanamh ath-sgrùdadh air mar a bheir uachdarain luach an airgid do dhaoine.

14 agus 15: Màl agus prìsean sheirbheisean

Bidh uachdarain shòisealta a' stèidheachadh ìrean màil agus phrìsean sheirbheisean ann an co-bhuinn ri an luchd-gabhail is luchd-ceannaich eile:

gus am bi cothromachadh ann eadar ìre nan seirbheisean a gheibhear, cosgaisean nan seirbheisean, agus cho furasta 's a tha e dhan luchd-ghabhail agus luchd-cleachdaidh a th' ann an-dràsta, agus dhan fheadhainn a dh'fhaodadh a bhith ann, prìs nan seirbheisean a phàigheadh

feuch am faigh luchd-gabhail fiosrachadh soilleir air mar a thèid am màl agus airgead eile a chosg, a' gabhail a-steach fios air cosgaisean sam bith a tha nas motha na na h-ìrean cosgais a chaidh aontachadh eadar na h-uachdarain agus an luchd-gabhail.

Tha na builean seo a' sealltainn: mar a tha dleastanas laghail air uachdarain beachdan an luchd-ghabhail a shireadh mu bhith a' stèidheachadh ìrean màil; cho cudromach 's a tha e gun tèid ealla a ghabhail ri nas urrainn dhan luchd-ghabhail agus luchd-ceannaich eile a th' ann an-dràsta, agus dhan fheadhainn a dh'fhaodadh a bhith ann, a phàigheadh; agus gu bheil e cudromach do thòrr luchd-gabhail gum bi fios aca air mar a tha an t-airgead aca ga chosg. Airson chomhairlean ionadail, mar phàirt dhe seo tha aca ri cumail ri stiùireadh Riaghaltas na h-Alba air cunntasan airson teachd-a-steach bho thaigheadas. Feumaidh gach uachdaran co-dhùnadh a dhèanamh, ann an co-bhuinn ri luchd-gabhail agus luchd-ceannaich eile, am bu chòir dhaibh fiosrachadh fhoillseachadh mu chaiteachas a tha nas àirde na ìre shònraichte, agus mun chruth anns an tèid sin fhoillseachadh agus dè cho mionaideach 's a bhios am fiosrachadh. 'S e a tha cudromach gum bi còmhraidhean ann agus gu bheil na co-dhùnaidhean a' gabhail ealla ri beachdan an luchd-ghabhail agus an luchd-ceannaich eile.