Scottish social housing charter: Gaelic translation

Fios mun chainnt

Thathar a' cleachdadh cuid a dh'abairtean/fhaclan air feadh na Cairte, agus tha mìneachadh orra gu h-ìosal.

Achd an Taigheadais (Alba) 2010, earrainn 31

Thathar ag ràdh ann an Earrainn 31 dhen Achd:

'Feumaidh Ministearan ìrean seirbheis is builean a stèidheachadh air am bu chòir do dh'uachdarain shòisealta a bhith ag amas nuair a tha iad a' coileanadh na h-obrach is nan gnìomhan taigheadais aca.

Canar "Cairt Taigheadais Shòisealta na h-Alba" ris an sgrìobhainn anns am faicear na h-ìrean is builean sin.'

Builean Nàiseanta

Tha a' Chairt a' toirt taic do na builean, gum bi daoine:

• a' fuireach ann an coimhearsnachdan a tha in-ghabhaltach, làidir, sàbhailte agus aig a bheil cumhachd
• a' cur luach is a' gabhail tlachd anns an àrainneachd aca agus a' cur dìon is a' toirt piseach oirre
• a' toirt spèis do, a' cur dìon air agus a' toirt chòraichean daonna gu buil agus beò gun leth-bhreith.

Buil

• 'S e a th' ann am buil, rud a tha sinn a' miannachadh a thachras.
• Tha a' Chairt a' stèidheachadh nam builean a bu chòir do dh'uachdarain shòisealta a choileanadh airson an luchd-ghabhail is luchd-ceannaich eile aca.
• Chan ann mu dheidhinn na nì uachdarain a tha a' Chairt no mu dheidhinn mar a nì iad e. 'S ann mu dheidhinn na bhios a' tachairt nuair a bhios luchd-ceannaich a' faighinn sheirbheisean bho uachdarain a tha i.

Riaghladair Taigheadais na h-Alba

'S e buidheann neo-eisimeileach a th' anns an Riaghladair a stèidhich Pàrlamaid na h-Alba gus uallach a ghabhail airson daoine a tha no a dh'fhaodadh a bhith gun dachaigh, luchd-gabhail aig uachdarain shòisealta, no luchd-cleachdaidh nan seirbheisean a bhios uachdarain shòisealta a' toirt seachad. Bidh an Riaghladair a' dèanamh sgrùdadh, measadh agus aithris air na h-ìrean coileanaidh aig uachdarain mu choinneimh bhuilean is ìrean na Cairte.

Ìrean Càileachd Taigheadais na h-Alba (ICTA)

'S e a th' anns an ICTA, a' phrìomh dhòigh aig Riaghaltas na h-Alba tomhas a dhèanamh air cho math 's a tha taigheadas sòisealta ann an Alba.

Taigheadas sòisealta

Taigheadas a bheir comhairlean no comainn thaigheadais seachad fo Ghabhaltas Tèarainte Albannach no Geàrr-ghabhaltas Tèarainte Albannach.

Uachdaran Sòisealta

• Comhairle a tha na h-uachdaran.
• Uachdaran neo-phrothaid, clàraichte le Riaghladair Taigheadais na h-Alba (mar eisimpleir, comann taigheadais, no co-chomann).
• Comhairle aig nach eil sealbh air taigheadas ach tha a' toirt sheirbheisean taigheadais seachad, mar eisimpleir, seirbheisean do dhaoine gun dachaigh.

Neach-ùidhe/Luchd-ùidhe

Neach no buidheann aig a bheil ùidh ann an taigheadas sòisealta agus an dòigh sa bheil e air a riaghladh. Seo agaibh eisimpleirean de luchd-ùidhe:

• Riaghladair Taigheadais na h-Alba.
• Luchd-gabhail aig uachdarain shòisealta agus na buidhnean a tha a' riochdachadh luchd-gabhail.
• Daoine gun dachaigh agus buidhnean a tha gan riochdachadh.
• Daoine a bhios a' cleachdadh sheirbheisean taigheadais a bheir uachdarain shòisealta seachad agus buidhnean a tha a' riochdachadh an luchd-chleachdaidh sin.
• Uachdarain shòisealta agus buidhnean a tha gan riochdachadh.
• Luchd-creideis tèarainte aig uachdarain shòisealta chlàraichte agus buidhnean a tha a' riochdachadh an luchd-chreideis sin.
• Coimisean Chunntasan na h-Alba.
• Coimisean na Co-ionannachd agus Coimisean nan Còraichean Daonna agus buidhnean eile le uallach airson chothroman co-ionann.

Ìre

Ìre càileachd a bu chòir dhan a h-uile uachdaran sòisealta a choileanadh.

Luchd-gabhail agus luchd-ceannaich eile

• Daoine a tha nan luchd-gabhail aig uachdaran sòisealta mu thràth.
• Daoine a dh'fhaodadh a bhith nan luchd-gabhail san ùine ri thighinn – mar eisimpleir, cuideachd a tha air cur a-steach airson gabhaltas.
• Daoine gun dachaigh.
• Daoine a tha a' cleachdadh seirbheis taigheadais a bheir uachdaran sòisealta seachad – mar eisimpleir, daoine aig a bheil sealbh air taigh a phàigheas uachdaran sòisealta gus seirbheis factair a thoirt seachad, no Siopsaich/Luchd-siubhail a chleachdas làraich a bheir uachdaran sòisealta seachad dhaibh.